Пададзены да Вашае ўвагі сьпіс шляхты ўтрымвае прозьвішчы рыцарства Вялікага Княства Літоўскага - абыватэляў амсьціслаўскага, берасьцейскага, валынскага, віленскага, віцебскага, інфлянцкага, кіеўскага, менскага, наваградзкага, падольскага, смаленскага, троцкага ваяводзтваў і Княства Жмудзкага, а таксама леннага ВКЛ Княства (інакш Герцагства) Курляндыі і Семігаліі. Ягонай падставай зьяўляецца база дадзеных "Згуртаваньня беларускае шляхты", якая была апрацавана ў адпаведнасьці з пастаўленым заданьнем: у рэестр занесены прозьвішчы толькі тых родаў, якія былі агульнапрызнаныя шляхтай, атрымалі набілітацыю, тытул ці індыгенат да 1795 года.

Што такое літоўская шляхта? Адказ на гэтае пытаньне дае сама шляхта. На падставе архіўных дадзеных, а менавіта - самаідэнтыфікаваньня паходжаньня сямей, якія даводзілі сваё шляхецтва ў губэрнскіх дваранскіх дэпутацыях, быў зроблены прыкладны аналіз яе складу. Самую шматлікую групу (каля 40-45%) складаюць ліцьвіны (сёньняшнія беларусы) і русіны (адна з папуляцый сёньняшніх украінцаў). Другую па колькасьці групу ўтвараюць этнічныя палякі, каля 25-30%. Далей ідуць немцы (зазвычай, выхадцы з Курляндыі ды Прусаў) і жмудзіны (сёньняшнія "летувяі", аналіз рабіўся па этымалёгіі прозьвішчаў) - па 10-15% кожных. Не больш за 5% складаюць прадстаўнікі ўсіх іншых этнасаў разам узятыя: татары, швэды, датчане, галянцы, габрэі, французы, шкоты, італьянцы да інш.

Лічыць рэестр скончаным не варта. Сьпіс шточас аднаўляецца.

Ю. Лычкоўскі.

* Крыжакам (†) пазначаны роды, якія згасьлі.

** Для дакладнейшай граматычнай перадачы правапісу прозьвішчаў уведзена літара "Ґ", што адпавядае літары лацінскага альфабэта "G". Літара "Г" адпавядае літары лацінскага альфабэта "H".

У дадатак да тэмы рэкамэндуем:

"Хто такія шляхцічы?" - Рыцарская падрыхтоўка шляхцічаў у XVI-XVII стагодзьдзях.

"Што такое шляхта?" - Народ шляхецкі.